kamakshi-ashtakam - lalithambigai Tamil Song Lyrics

சங்கடம் நீக்கிடச் சடுதியில் வந்திடும் சங்கரி சௌந்தரியே!

கங்கண பாணியன் கனிமுகம் கண்டநல் கற்பகக் காமினியே!

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

தானுறு தவ ஒளி தாரொளி மதி ஒளி தாங்கியே வீசிடுவாள்;

மானுறு விழியாள், மாதவர் மொழியாள், மாலைகள் சூடிடுவாள்;

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

பொங்கு அரிமாவினில் பொன்னடி வைத்துப் பொருந்திட வந்தவளே!

எம்குலம் தழைத்திட எழில் வடிவுடனே எழுந்த நல் துர்க்கையளே!

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

கணகண கங்கண கதிரொளி வீசிடக் கண்மணி நீவருவாய்;

பணபண பம்பண பறையொலி கூவிடப் பண்மணி நீவருவாய்;

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

கொஞ்சிடும் குமரனைக் குணம்மிகு வேலனைக் கொடுத்த நல் குமரியளே!

சங்கடம் தீர்த்திடச் சமரது செய்த நல் சக்தி எனும் மாயே!

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

பண்ணிய செயலின் பலனது நலமாய்ப் பல்கிட அருளிடுவாய்;

கண்ணொளி அதனால் கருணையே காட்டிக் கவலைகள் தீர்ப்பவளே!

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

சுடர்தரு அமுதே! சுருதிகள் கூறிச் சுகமது தந்திடுவாய்;

படர்தரு இருளில் பரிதியாய் வந்து பழவினை ஓட்டிடுவாய்

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!

ஜெய ஜெய துர்கா ஸ்ரீபரமேஸ்வரி ஜெய ஜெய ஸ்ரீதேவி!

ஜெய ஜெய ஜெயந்தி! மங்களகாளி! ஜெய ஜெய ஸ்ரீதேவி!

ஜெய ஜெய சங்கரி! கௌரி கிருபாகரி! துக்க நிவாரணி காமாட்சி!